AKONG MAGTUTUDLO, AKONG BAYANI

            Ang kinabuhi usa ka gubat. Gubat taliwala sa duha ka baroganan, baroganan sa pagkamatarong ug baroganan sa pagkadautan. Usa ka gubat nga halapad sama sa kalibutan kay nilungtad kini sa matag nasod, matag siyudad, ug sa kasingkasing sa tawo.

            Magtutudlo asa ka nagabarog? Ang imong hunahuna, pulong ug binuhatan nagasubay ba sa kamatuoran? Ang kanta nga gimugna ni Dioscoro B. Vicente nagaingon, “Ako ang magtutudlo, nagadala sa kamatuoran ug kahayag….”Nagkalain-laing dagway sa kabataan, uhaw sa kamatuoran, gutom sa gugma ug naglatagaw ang hunahuna. Magtutudlo, panahon na, nga kab-oton mo sila.

            Kanunay natong ginalitok ang mga pulong ni Dr. Jose P. Rizal, “Ang kabataan maoy paglaom sa nasud.” Kanus-a kini natuman? Aduna bay nahitabo? Magtutudlo, dako ka ug mahimo, kung ang ilang kasingkasing imong matudloan sa pagkamatarung sa Dios ug tinuod nga pagtulon-an. Adunay panultihon, “Ang buta dili makagiya sa buta,” ug usab, “Dili ka makahatag sa wala kanimo.”

            Umulon ang mga kabataan, dili sa bakak nga pagtulon-an o hiwi nga edukasyon. Umulon sila sa bulawanong pagtulun-an sa hunahuna, pulong ug binuhatan. Ang kasingkasing nga maoy tuburan sa kinabuhi pagatultulan sa lunhawng sibsiban.

            Akong magtutudlo, akong bayani! Takos ba ikaw nga pagatawgon niini? Gilatas mo ang dagat, sapa, kabukiran ug suok nga dalan aron matudloan ang mga kabataan nga lawom ug pagkinahanglan. Gitulak mo ang kariton nga tunghaan padulong sa ilalom sa tulay, sa kabaybayonan ug daplin sa basurahan aron bangonon ang paglaom nga napukan sa mga bata sa kadalanan. Gitungas mo ang bungtod ug lamak nga dalan bitbit ang dahon ug uling nga mga gamiton sa pagtudlo og numero, letra ug silaba. Wala mo panumbalinga ang kalisod ug hulga sa bala ug terorismo aron lamang ipaambit ang dakong gugma sa Dios sa mga bata nga hilabihan ang pag-antus.Gikalimtan mo ang kaharuhay sa panimalay. Adlaw ug gabii nagtukaw sa pag-ampo ug pagtuon gamit ang nagkalin-laing teknolohiya ug gamiton sa pagtudlo aron masangkapan ang kaugalingon sa saktong hinanggiban- ang husto ug maayong edukasyon alang sa mga kabataan nga nangandoy sa hayag na kaugmaon.

            Oo, adunay kakapoy, kasakit, kalisdanan ug kamatayon nga mahimong sagubangon. Pagmalig-on! Samtang aduna pay bidlisiw, padayon sa pagpamuhat nga mapainubsanon. Mapailubon nga magbuhat sa dakong ganti nga gi-andam sa Dios sa adlaw sa paghukom. Sa dihang ang ganghaan pagaablihan, aduna bay mosugat ug moingon kanimo? “Akong magtutudlo, akong bayani, Dayon, kay ikaw man nagmatinud-anon!”

                                                                                

                                                                            Gisulat ni:

MINERVA V. MOISES

TEACHER-I

LINOSOTAN   ES

KAPUTIAN DISTRICT, IGACOS